Karen Tazi

Karen Tazi

Rugadh agus tógadh Karen Tazi (Farrelly) i mBaile Átha Cliath. Ghlac sí céim i U.C.D. agus rinne sí traenáil mar mhúinteoir bunscoile i gColáiste Phádraig, Droim Conrach. Tar éis di scaitheamh a chaitheamh ag múineadh i mbunscoileanna Bhaile Átha Cliath thug sí aghaidh ar Pharis na Fraince, áit a bhfuil sí ag obair ó shin mar oide sa scoil chlúitiúil idirnáisiúnta Marymount. Is i bpríomhchathair na Fraince a chónaíonn sí in éindí lena fear céile agus a hiníon.

Is aoibhinn le Karen ilghnéitheacht chultúrtha Pharis ach ní mó a shásaíonn í ná am a chaitheamh lena muintir anseo in Éirinn, oiread agus is féidir. Tá sí paiseanta faoin léitheoireacht agus faoin bpéintéireacht. Tá trí leabhar, ar a rinne sí féin an scríobh agus na léaráidí, foilsithe ag An Gúm, mar atá
Ar Thóir na Cailíse
, Cogarnach ar an bhFeirm agus Bliain sa Fhrainc. Tar éis di tabhairt faoin Mandarin Sínis a fhoghlaim dornán de bhlianta ó shin, scríobh sí Na Clocha Síneacha, a d’fhoilsigh MÓINÍN i bhFómhar 2009. Ainmníodh Na Clocha Síneacha ar Ghearrliosta Leabhar na Bliana do Dhaoine Óga 2010.